Sjaerdema State

Uit: ‘Aanbreng van de zwanejachten in 1529’, It boek fan de Swan.

Ende eerst uyt Francker ende Frankerdeel.
(1) Gherolt Herama, Raadt der K.M. voer hem ende den geslachte
van Sierdema, segt dat de jacht van Francker binnen dyex die van
Siardema toebehort ende naerdat sy in Siardema goet gheerfft sín,
deylen zy die swanen uytgenomen de jachte van Tsum, die hie segt
den geslachte van Harama alleen toe behoeren; te verstaene van
die staten (1 verso) hebben binnen Tsum.
Aengaende het teycken van Siardema seggen dat zy gheen en hebben
maer wat hen hout binnen de limiten voersz., jagen ende deylen zy
pro rata soeverre deselve niet geteyckent en sin met bekende teycke-
nen van andere luyden, daertoe gerechticht zynde, maer die van
Herama hebben een teycken te weten: Aen den rechtervoet de
middelste clauw aff ende den lufteren voet binnen gespleten ende
dat op aventuren oft enige van huere zwanen buyten vlogen, dat
sy die mogen weten weder te crigen. Jaghen hen nochtans indislicke
geteyckent offt ongeteyckent wat binnen Tsum voersz bevonden
wort soeverre die gheen ander luyden bekende teykenen en hebben.
Ende seggen geen brieven te hebben, maer possessie van soelange
tyt, dat geen memorie ter contrarie en is. Protesterende van wegen
als boven dat alsulcke aenbrengh als by anderen ter contrarie gedaen
mochte wordden hem niet scadelick wezen; en sal soe hy hem daer
tegen opposeerde ende presenteerde rechts te pleegen.